𞤑𞤢𞤤𞤢𞤲𞤼𞤭𞥅𞤯𞤫 · 𞥑𞥗 𞤅𞤫𞥅𞤯𞤼𞤮 𞥒𞥐𞥒𞥖

𞤂𞤫𞤴𞤣𞤭 𞤘𞤭𞤲𞤫 𞤶𞤢𞤩𞤭 𞤀𞤁𞤂𞤢𞤃 𞤲𞤣𞤫𞤪 𞤸𞤮𞤣𞥆𞤭𞤪𞤮𞥅𞤪𞤫

𞤖𞤢𞤲𞤣𞤫 𞤲𞤣𞤫𞥅 𞤱𞤮𞤲𞤭 𞤳𞤮𞤴𞤣𞤮 𞤢𞤪𞤢𞤲𞤣𞤫⹁ 𞤸𞤮𞤣𞥆𞤭𞤪𞤮𞥅𞤪𞤫 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤲𞤮 𞤱𞤭𞤲𞤣𞤭 𞤀𞤁𞤂𞤢𞤃⹁ 𞤲𞤣𞤫 𞤸𞤮𞤳𞥆𞤭 𞤖𞤮𞥅𞤪𞤫𞥅𞤶𞤮 𞤘𞤭𞤲𞤫 𞤸𞤵𞥅𞤱𞤼𞤵𞤺𞤮𞤤 𞤥𞤮𞤤. 𞤀𞤤𞤳𞤵𞤤𞤫 𞤶𞤢𞤲𞤺𞤭𞥅 𞤲𞤣𞤫𞤪 𞤟𞤫𞤪𞤫𞤳𞤮𞥅𞤪𞤫 𞤫 𞥑𞥙𞥘𞥙⹁ 𞤯𞤵𞤥 𞤲𞤮 𞤱𞤮𞤲𞤭 𞤼𞤢𞤳𞥆𞤵 𞤥𞤢𞤱𞤲𞤣𞤵 𞤲𞤣𞤫𞤪 𞤆𞤫𞤰𞥆𞤮𞤤 𞤥𞤢𞤳𞥆𞤢𞤤.

𞤂𞤫𞤴𞤣𞤭 𞤘𞤭𞤲𞤫 𞤶𞤢𞤩𞤭 𞤀𞤁𞤂𞤢𞤃 𞤲𞤣𞤫𞤪 𞤸𞤮𞤣𞥆𞤭𞤪𞤮𞥅𞤪𞤫

𞤖𞤮𞤲𞤣𞤭 𞤸𞤮𞤣𞥆𞤭𞤪𞤮𞥅𞤪𞤫 𞤲𞤣𞤫𞤲 𞤸𞤭𞥅𞤪𞤭

𞤐𞤣𞤫𞤪 𞥑𞥗 𞤅𞤫𞥅𞤯𞤼𞤮 𞥒𞥐𞥒𞥖⹁ 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤃𞤢𞤥𞤢𞤣𞤭 𞤁𞤵𞤥𞤦𞤵𞤴𞤢 𞤧𞤫𞤪𞤭 𞤸𞤮𞤣𞥆𞤭𞤪𞤮𞥅𞤪𞤫 𞤳𞤮 𞤸𞤮𞤪𞤼𞤮𞤪𞤭 𞤺𞤢𞤤𞤼𞤭 𞤫 𞤬𞤫𞤣𞥆𞤭𞤲𞤺𞤮𞤤 𞤁𞤭𞤪𞤫𞤳𞤧𞤭𞤴𞤮𞤲 𞤑𞤮𞤥𞤵𞤲𞤭𞤳𞤢𞤧𞤭𞤴𞤮𞤲 𞤖𞤮𞥅𞤪𞤫𞥅𞤶𞤮. 𞤘𞤢𞤤𞤼𞤭 𞤳𞤫𞤧𞤫 𞤁𞤭𞤪𞤫𞤳𞤧𞤭𞤴𞤮𞤲 𞤯𞤮𞤲 𞤲𞤮 𞤱𞤮𞤲𞤭 𞤴𞤢𞤤𞥆𞤭𞤲𞤺𞤮𞤤 𞤳𞤢𞤤𞤢𞤥𞤵 𞤖𞤮𞥅𞤪𞤫𞥅𞤶𞤮 𞤤𞤫𞤴𞤣𞤭 𞤲𞤣𞤭𞤲 𞤲𞤣𞤫𞤪 𞤯𞤫𞤲𞤺𞤢𞤤𞤫 𞤤𞤫𞤴𞤣𞤭⹁ 𞤸𞤢𞤦𞤭𞤼𞤵𞥅𞤶𞤭 𞤆𞤵𞤤𞤢𞤪⹁ 𞤫 𞤸𞤵𞥅𞤱𞤼𞤵𞤺𞤮𞤤 𞤯𞤫𞤲𞤺𞤢𞤤𞤫 𞤤𞤫𞤴𞤣𞤭 𞤫 𞤀𞤁𞤂𞤢𞤃.

𞤖𞤮𞤣𞥆𞤭𞤪𞤮𞥅𞤪𞤫 𞤲𞤣𞤫𞤲 𞤬𞤫𞤣𞥆𞤭 𞤫 𞤧𞤫𞤳𞤧𞤭𞤴𞤮𞤲 𞤯𞤫𞤲𞤺𞤢𞤤𞤫⹁ 𞤨𞤮𞤨𞤼𞤢𞤤 𞤫 𞤳𞤮𞤥𞤵𞤲𞤭𞤳𞤢𞤧𞤭𞤴𞤮𞤲 𞤬𞤮𞤬⹁ 𞤲𞤣𞤭 𞤸𞤮𞤪𞤼𞤮𞤪𞤢 𞤨𞤮𞤨𞤼𞤵𞤺𞤮𞤤 𞤣𞤫𞤪𞤼𞤫 𞤤𞤫𞤴𞤣𞤭 𞤲𞤣𞤫𞤪 𞤯𞤫𞤲𞤺𞤢𞤤𞤫 𞤤𞤫𞤴𞤣𞤭 𞤫 𞤸𞤵𞥅𞤱𞤼𞤵𞤺𞤮𞤤 𞤯𞤫.

𞤫 𞤤𞤢𞤩𞤭 𞤁𞤮𞤧𞤼𞤫𞤪𞤫 𞥒𞥐𞥒𞥕

𞤁𞤮𞤧𞤼𞤫𞤪𞤫 𞤬𞤮𞤳𞥆𞤭𞤼𞤢𞥄𞤲𞤣𞤫 𞤲𞤣𞤫𞤪 𞥒𞥖 𞤅𞤭𞤤𞤼𞤮 𞥒𞥐𞥒𞥕 𞤱𞤢𞤯𞤭 𞤯𞤫𞤲𞤺𞤢𞤤𞤫 𞤤𞤫𞤴𞤣𞤭 𞤘𞤭𞤲𞤫 𞤯𞤫𞤲𞤺𞤢𞤤𞤫 𞤤𞤫𞤴𞤣𞤭𞤲𞤳𞤮𞥅𞤶𞤫⹁ 𞤯𞤫 𞤲𞤮 𞤸𞤢𞤲𞤣𞤭 𞤫 𞤊𞤢𞤪𞤢𞤲𞤧𞤭. 𞤖𞤮𞤣𞥆𞤭𞤪𞤮𞥅𞤪𞤫 𞤅𞤫𞥅𞤯𞤼𞤮 𞤲𞤮 𞤱𞤮𞤲𞤭 𞤸𞤮𞤳𞥆𞤵𞥅𞤪𞤫 𞤢𞤪𞤢𞤲𞤣𞤫 𞤲𞤣𞤫 𞤩𞤮𞤼𞥆𞤭𞤲𞤫𞥅 𞤣𞤮𞤧𞤼𞤫𞤪𞤫 𞤲𞤣𞤫𞤲⹁ 𞤲𞤣𞤫𞤪 𞤖𞤮𞥅𞤪𞤫𞥅𞤶𞤮 𞤳𞤢𞤲𞤳𞤮. 𞤌 𞤲𞤮 𞤵𞤥𞤦𞤵𞤣𞤭 𞤤𞤢𞥄𞤤 𞤳𞤢𞤤𞤢𞤥𞤵 𞤤𞤫𞤴𞤣𞤭 𞤲𞤣𞤫𞤪 𞤆𞤵𞤤𞤢𞤪 𞤱𞤭𞤲𞤣𞤢𞥄𞤯𞤮 𞤫 𞤀𞤁𞤂𞤢𞤃.

𞤖𞤮𞤲𞤣𞤭 𞤯𞤵𞤥 𞤸𞤮𞤤𞥆𞤭𞤼𞤭

𞤅𞤭𞤼𞤢𞥄𞤲𞤣𞤫 𞥓𞥗⹁ 𞤀𞤁𞤂𞤢𞤃 𞤥𞤢𞤱𞤲𞤭 𞤳𞤮 𞤤𞤫𞤧: 𞤲𞤫𞥅𞤲𞤫𞤺𞤮𞤼𞤮𞥅𞤩𞤫 𞤯𞤭𞤯𞤮 𞤲𞤣𞤫𞤪 𞤟𞤫𞤪𞤫𞤳𞤮𞥅𞤪𞤫⹁ 𞤶𞤢𞤲𞤺𞤭𞤲𞤮𞥅𞤩𞤫 𞤩𞤫 𞤴𞤢𞥄𞤤𞤭 𞤳𞤮𞤴𞤯𞤫 𞤳𞤢𞤤𞤢 𞤳𞤢𞤪𞤼𞤭𞤴𞤫⹁ 𞤶𞤢𞤲𞤺𞤭𞤪𞤤𞤫⹁ 𞤣𞤫𞤬𞤼𞤫 𞤫 𞤸𞤫𞤧𞤤𞤫⹁ 𞤲𞤣𞤫𞤪 𞤤𞤢𞤦𞥆𞤢𞤤 𞤒𞤵𞥅𞤲𞤭𞤳𞤮𞥅𞤣 𞤫 𞥒𞥐𞥑𞥖 𞤫 𞤱𞤢𞤤𞥆𞤭𞤲𞤺𞤮𞤤 𞤃𞤢𞤴𞤳𞤮𞤪𞤮𞤧𞤮𞤬𞤼⹁ 𞤘𞤵𞥅𞤺𞤢𞤤 𞤫 𞤀𞥄𞤨𞤮𞤤. 𞤖𞤢𞥄 𞤸𞤢𞤲𞤣𞤫⹁ 𞤪𞤫𞤲𞤣𞤮𞥅𞤶𞤭 𞤯𞤫𞤲 𞤲𞤮 𞤱𞤮𞤲𞤭 𞤩𞤫 𞤩𞤮𞤼𞥆𞤭 𞤯𞤮𞤲. 𞤉 𞤲𞤣𞤫𞥅 𞤸𞤮𞤣𞥆𞤭𞤪𞤮𞥅𞤪𞤫⹁ 𞤂𞤫𞤴𞤣𞤭 𞤘𞤭𞤲𞤫 𞤱𞤭𞤲𞤣𞤭 𞤀𞤁𞤂𞤢𞤃 𞤲𞤣𞤫𞤪 𞤣𞤫𞤪𞤼𞤫𞤪𞤫 𞤤𞤫𞤴𞤣𞤭⹁ 𞤮 𞤸𞤮𞤳𞥆𞤭 𞤸𞤵𞥅𞤱𞤼𞤵𞤺𞤮𞤤 𞤥𞤮𞤤 𞤲𞤮𞤳𞥆𞤵𞥅𞤪𞤫 𞤼𞤮𞥅 𞤼𞤵𞤥𞤦𞤵𞤣𞤭.

𞤐𞤣𞤫𞥅𞤲 𞤲𞤮 𞤱𞤮𞤲𞤭 𞤼𞤮𞥅𞤤𞤲𞤢𞤺𞤮𞤤 𞤬𞤢𞥄 𞤩𞤫 𞤬𞤮𞤬 𞤩𞤫 𞤶𞤢𞤲𞤺𞤭⹁ 𞤩𞤫 𞤶𞤢𞤲𞤺𞤭𞤲𞤭⹁ 𞤩𞤫 𞤱𞤭𞤲𞤣𞤭 𞤫 𞤩𞤫 𞤴𞤢𞤤𞥆𞤭𞤲𞤭 𞤫 𞤀𞤁𞤂𞤢𞤃⹁ 𞤳𞤢𞤤𞤢 𞤲𞤫𞤯𞥆𞤮 𞤫 𞤧𞤫𞥅𞤯𞤢 𞤥𞤢𞤳𞥆𞤮⹁ 𞤬𞤢𞥄 𞤆𞤵𞤤𞤢𞤪 𞤶𞤢𞤲𞤺𞤫𞤪𞤫 𞤫 𞤱𞤭𞤲𞤣𞤫𞤪𞤫 𞤫 𞤀𞤤𞤳𞤵𞤤𞤫 𞤥𞤢𞤳𞥆𞤫.

𞤖𞤮𞤲𞤣𞤭 𞤱𞤮𞤲𞤭 𞤢𞤲𞤣𞤢𞤲𞤣𞤫

𞤖𞤮𞤣𞥆𞤭𞤪𞤮𞥅𞤪𞤫 𞤲𞤮 𞤱𞤮𞤲𞤭 𞤬𞤵𞤯𞥆𞤮𞤪𞤣𞤫. 𞤐𞤮 𞤸𞤢𞤶𞤭𞤼𞤮 𞤶𞤢𞤲𞤺𞤭𞤲𞤺𞤮𞤤 𞤺𞤢𞤤𞤼𞤮𞥅𞤩𞤫⹁ 𞤸𞤢𞤱𞤼𞤵𞤺𞤮𞤤 𞤢𞤱𞤤𞤭𞤼𞤭 𞤫 𞤼𞤢𞤨𞥆𞤭𞤪𞤯𞤫 𞤀𞤁𞤂𞤢𞤃 𞤫 𞤳𞤢𞤩𞤭𞤪𞤯𞤫 𞤤𞤫𞤴𞤣𞤭⹁ 𞤫 𞤴𞤢𞤤𞥆𞤭𞤲𞤺𞤮𞤤 𞤳𞤢𞤤𞤢𞤥𞤵 𞤤𞤫𞤴𞤣𞤭 𞤢𞤪𞤢𞤲𞤯𞤫 𞤫 𞤀𞤁𞤂𞤢𞤃. 𞤏𞤭𞤲𞤣𞤫𞤲 𞤔𞤢𞤲𞤺𞤫𞤲 𞤀𞤁𞤂𞤢𞤃 𞤲𞤮 𞤸𞤫𞤩𞤭𞤪𞤢 𞤱𞤢𞤤𞥆𞤭𞤲𞤺𞤮𞤤 𞤫 𞤶𞤢𞤲𞤺𞤭𞤲𞤮𞥅𞤩𞤫 𞤥𞤢𞤳𞥆𞤢𞤤⹁ 𞤨𞤮𞤨𞤼𞤢𞤤⹁ 𞤢𞤱𞤤𞤭𞤼𞤭 𞤫 𞤼𞤢𞤨𞥆𞤭𞤪𞤯𞤫⹁ 𞤫 𞤀𞥄𞤤𞤢𞥄𞤶𞤭 𞤶𞤢𞤲𞤺𞤭𞤲𞤺𞤮𞤤.

𞤘𞤢𞤤𞤼𞤮𞤯𞤫𞤲 𞤆𞤫𞤰𞥆𞤮𞤤 𞤀𞤁𞤂𞤢𞤃 𞤲𞤺𞤮𞤤